GOVPH

Details

Farm-to-Market Road ubos sa Support to Barangay Development Program pormal nga giturn-ober ngadto sa Barangay Concepcion ug Laligan.

Gikalipay sa mga residente sa Barangay Concepcion ug Laligan ning Dakbayan sa Valencia ang natapos nga bag-ong farm to market road nga napatuman ubos sa Local Government Support Fund - Support to Barangay Development Program (LGSF-SBDP), Pebrero 17, 2023.

Mukabat sa P20 million ang kantidad sa matag proyekto nga usa usab ka inisyatiba sa National Government pinaagi sa Executive Order No. 70 ni kanhi presidente Rodrigo Duterte nga nagapalig-on sa pakiglambigit sa mga lokal nga pangagamhanan alang sa pagsugpo sa insurhensya pinaagi sa paghatag og saktong pagtagad sa mga panginahanglanon sa mga kabarangayan, ilabi na ang mga komunidad sa hilit nga mga dapit, sama sa pagtukod og mga proyektong pang-imprastraktura.

Sa gipahigayon nga turnover ceremony sa Barangay Laligan covered court, gipaabot ni Mayor Azucena Huervas ang iyang dakong kalipay sanglit dugang kalamboan pagusab ang nahatod alang sa maong mga barangay nga nahimo pinaagi sa hiniusang pagtinabangay sa mga nagkalin-laing ahensiya ug komunidad.

Gisaysay usab ni Datu Moret Anggawa, Barangay Concepcion Tribal Chieftain, ang kapait nga naagian sa ilang komunidad niadtong wala pa makonkreto ang dalan ingon man ang ilang dakong kalipay ug pasalamat sa pagdungog kanila ug pagpatuman sa maong proyekto.

"Perti gyud namong lipaya kay ang mga sakyanan makaabot na sa among uma. Nakita jud namo sa akong katribo nga naa gyud diay gobyerno nga mutabang sa amoa...Nakita gyud namo nga dili na maglisod ang mga lumad," matod ni Datu Anggawa.

Isip mga Punong Barangay sa Laligan ug Concepcion, mapasalamaton usab sila Kapitan Modesto Jardinico ug Luzviminda Santillan sa pagkumpleto sa maong dakong proyekto, ilabi na ngadto kang Mayor Azucena Huervas nga kanunay nangusog nga mapatuman ang maong programa ug ang uban pang proyekto nga ilang nadawat ubos sa iyang pagdumala.

"Kini nga proyekto dako kaayo og tabang sa atong kaigsuonang lumad nga nanginabuhi didto tumoy sa bungtod...Sa una kabayo ra ug balsa sa kabaw ang kargahan sa mga produkto. Mao nang pag-abot ani nga proyekto, dako kaayo ang kalipay sa atong katawhan sa Barangay, wala gyud ta pasagdi sa atong gobyerno. Grabeng ayuda among nadawatan, dili lang ni mao nga project, naa'y nagagikan sa atong palanggang mayor, daghan kaayo ang iyang nahatag busa dako kaayo ang atong pagpasalamat," matod ni Kapitan Santillan.

Atol sa seremonya, gipahimangnoan usab ni Regional Director Wilhelm Suyko, CESO IV, DILG -X, ang mga benepisyaro nga pahimuslan og ayo ug ampingan ang gasa nga ilang nadawat. Personal usab niya nga gidayeg ang maayong pagdumala ni Mayor Huervas. "The Philippines has 146 cities...We need 146 Mayor Huervas in the Philippines to make our country beautiful and progressive," matod ni Director Suyko.

Natapos ang seremonya sa pagsuporta nila Councilor Jerusha "Sasang" Cadigal-Recla ug Councilor Mauricio "Totong" Sistoso, Rhona Padraza-Abadilla, DILG-Bukidnon Provincial Director, Jan Eric Manasan, City Local Government Operations Officer, Engr. Rodina Onting, City Engineer, Architect Bjorn Didaagon, OIC-City Planning and Development Office, representate gikan sa RRN Construction ug Buffalo Construction and Supply, ingon man sa pwersa sa kapulisan nga gipangunahan ni PCPT. Larry Malhin, ug sa 88th Infantry Batallion nga gipangunahan usab ni Captain Sancho Tomaguin.

(Susamang Storya: Pagturn-ober sa SBDP FMR project sa Barangay Barobo: https://bit.ly/3EFHBmv)

Created: 17 February 2023

Hits: 247